Publicado por 
A Xunta publica hoxe no Diario Oficial de Galicia (DOG) a convocatoria para este ano das probas de avaliación en competencia clave, que organiza a Consellería de Economía, Emprego e Industria.
Estas probas de avaliación permiten aos beneficiarios que non teñan un nivel determinado de formación acreditada acceder a aqueles cursos de formación vinculados a certificados de profesionalidade. Estes exames, polo tanto, diríxense ás persoas que non posúen os requisitos de formación básica (ESO para o nivel 2 ou Bacharelato para o 3) requiridos para acceder aos cursos dos certificados de profesionalidade, co fin de que a través destas probas podan demostrar que posúen os coñecementos e capacidades básicas que lles permitan acceder e cursar con aproveitamento esta formación para o emprego.
Os interesados en realizar estas probas- de matemáticas, lingua castelá, inglés e galego- poderán presentar a súa solicitude ata o próximo 23 de marzo. Os exames terán lugar o 12 de maio no Recinto Feiral de Silleda.
O modelo de solicitude estará dispoñible na guía de procedementos de servizos da Xunta de Galicia no enderezo https://sede.xunta.gal. A Consellería de Economía, Emprego e Industria dispón, ademais, dun enderezo específico onde se pode atopar toda a información e documentación necesaria, sobre este procedemento: http://emprego.ceei.xunta.gal/portada-competencias-clave.
A participación nas probas realizadas en 2017, tanto para o nivel 2 como o 3, aumentou con respecto a 2016 en preto dun 40% e a media da porcentaxe de aptos chegou ao 70%. A porcentaxe de aptos no nivel 2 foi do 75% e no 3 do 64%.
A posta en marcha desta iniciativa responde á renovación que desde 2009 se vén realizando en toda a oferta de formación para o emprego, en base aos novos certificados de profesionalidade. A iniciativa busca fomentar a calidade da formación profesional para o emprego mellorando o perfil profesional das persoas e motivándoas para progresar no eido do emprego e na formación co obxectivo último de acadar a inserción no mercado de traballo. Entre 2009 e 2017 solicitaron participar nestas probas máis de 28.800 persoas.
Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.