Publicado por 
Mellora a capacidade de reacción e o equilibrio, exercita os músculos do corpo, tanto do tren superior como do inferior, favorece o bo estado cardiovascular e axuda a perder peso cun risco de lesión moi reducido. Estes son só algúns dos beneficios cos que as e os afeccionados ao tenis de mesa defenden a práctica deste deporte. Co obxectivo de fomentalo entre a comunidade universitaria a Área de Benestar, Saúde e Deporte e o Club Tenis de Mesa de Vigo organizaron para este xoves unha xornada de portas abertas, de 14.00 a 17.00 horas no pavillón de deportes, na que dous adestradores do club explicarán os principais segredos deste deporte a todas as persoas que asistan.
De carácter gratuíto e aberta ao público en xeral, a xornada busca a implicación tanto das persoas que xa son afeccionadas a este deporte e queren perfeccionar a súa técnica, como dos que nunca practicaron e queren probar. Neste senso, haberá pas dispoñibles para todas aquelas persoas que non dispoñan dunha.
As persoas interesadas en participar deben inscribirse previamente na páxina web de DeporXest. Roberto Costas, secretario do Club de Tenis de Mesa de Vigo, explica que, por unha banda, “a xornada permitirá que os membros da comunidade universitaria interesados neste deporte se coñezan entre eles, o que podería ser un bo punto de partida para organizar quedadas nas que pasar un bo intre xogando” e, por outra, “avaliar a posibilidade de establecer no futuro algún grupo de adestramento ou actividades xa máis concretas”.
“O deporte con máis federados do mundo”
O tenis de mesa é, segundo Costas, “o deporte con máis federados do mundo”. Esta circunstancia vén dada, segundo explica, por varias razóns como, por exemplo, o pouco gasto económico que require e, tamén, pola infinidade de beneficios que achega, pois, ademais dos relativos ao estado físico, “o tenis de mesa estimula a concentración e a axilidade mental xa que require unha atención constante no xogo. Un período de menos dun segundo sen estar suficientemente concentrado pode significar perder un punto”, recalca. Esta característica, “xunto coa moderada esixencia física que require”, fai que este deporte sexa axeitado para que persoas de diferente idade o poidan realizar. Outro dos motivos que animan ás persoas a practicar esta disciplina é “o ambiente que o rodea que, en xeral, é moi bo. Polo tanto, axuda a socializar”, insiste Costas. Ademais, segundo aseguran dende o club, as miles de posibilidades e estilos que recolle o tenis de mesa fan deste deporte unha actividade amena “na que non se deixa de aprender”.
Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.