O portavoz do Grupo Socialista, Gonzalo Caballero, centrará a sesión de control do próximo Pleno do Parlamento nas medidas do goberno para frear a terceira onda. Así o explicou o viceportavoz do Grupo Socialista, Pablo Arangüena, logo da reunión da Xunta de Portavoces que fixou a orde do día para a próxima sesión plenaria.
Arangüena sinalou que “por responsabilidade non cuestionamos as restricións establecidas polo goberno galego, pero levamos meses pedindo o reforzo da Atención Primaria e do sistema de rastrexo” que é “necesario e urxente”. Sinalou que a Xunta “ten tódolos medios” grazas a un Orzamento expansivo derivado da inxección de axuda do Estado, e esixiulle que “sexa responsable, recoñeza os erros e deixe de botar balóns fora e buscar culpas alleas”.
Puntualizou que “non pode ser que no que vai de ano lle botara a culpa ao goberno de España, á cidadanía e incluso a Portugal, cando foi o máximo defensor de que non se parase a economía no Nadal e de que se permitiran celebracións familiares amplas”, e agora os hospitais galegos sofren “a máxima presión”. Os socialistas presentarán unha interpelación para que a Xunta explique os criterios que os levaron a abrir a mobilidade e as reunións naquelas festas.
Criticou que a estratexia defensiva do presidente da Xunta o levara, a semana pasada, a pedirlle á cidadanía que fora “implacable” cos incumpridores, unha afirmación que para Arangüena resulta “democraticamente impresentable”. Advertiu que se trata dunha “mensaxe propia do salvaxe oeste, moi perigosa, que implica poñer á xente a exercer de policía, a xente contra a xente” e un “ramalazo autoritario e populista dun presidente da Xunta que sempre busca culpas alleas”.
Vacinación
O responsable socialista anunciou ademais unha pregunta urxente para reclamarlle á Xunta que explique as medidas que vai tomar diante das irregularidades detectadas nos procesos de vacinación. Lembrou que mentres o presidente da Xunta falaba a semana pasada de 20 casos irregulares en Pontevedra, e de que non había alcaldes do PP implicados, os sindicatos falan de máis de 200 e os medios de comunicación revelaron o caso da alcaldesa de Boimorto.
Pablo Arangüena puntualizou que “temos que impedir que haxa sombra de sospeita sobre o proceso de vacinación, que ten que ser xusto e sometido a criterios estritos”, e apuntou que “non pode ser que haxa sospeitas sobre favoritismo cando hai cada día máis xente nos hospitais”.
O Grupo Socialista presentará tamén unha interpelación para pedirlle á Xunta máis financiamento para os concellos, que están a asumir un forte incremento de gastos derivados da pandemia por funcións propias da Xunta, como a limpeza dos centros de saúde, colexios ou asistencia social. Criticou a “deslealdade e irresponsabilidade” dun goberno que incrementa os orzamentos nun 14 por cento grazas ás axudas do Estado pero conxela as partidas dos concellos.
Tamén presentarán unha pregunta oral para reclamar o incremento de axudas ao comercio, porque “non pode ser que logo de recibir o ano pasado 224 millóns do Estado para compensar a caída da actividade económica, a Xunta só destinara 22 millóns en todo 2020 para hostalería, pequeno comercio, microempresas e autónomos.
Lembrou que os Orzamentos de 2021 son os maiores da historia con 11.500 millóns para un goberno que non fixo os “deberes” que si asumiu o Estado ao inxectar “máis de 1.100 millóns de euros directamente en Galicia durante o ano pasado para política social, ERTEs, axudas aos autónomos, ou o Ingreso Mínimo Vital. Os socialistas tamén presentarán unha proposición non de Lei para duplicar as axudas á cultura, incorporando ademais axudas directas.
Ferrolterra
O Pleno incluirá unha proposición non de Lei para pedirlle á Xunta un Plan industrial para Ferrolterra, incluíndo a captación de investimentos relacionados coa eólica mariña e sectores industriais viables, así como unha Mesa de traballo coas administracións estatal e locais para abordar a reindustrialización de Ferrol, Eume e Ortegal. Criticou que a Xunta leve dez anos sen exercer as súas competencias en materia industrial, que reduce a “botarlle a culpa ao goberno”.
Finalmente, o Grupo Socialista presentará unha pregunta oral para pedirlle á Xunta que recupere o diálogo social coa Unidade de Policía Adscrita, logo de que presidente da Xunta criticara no último Pleno a organización das forzas e corpos de seguridade do Estado “permitíndose sementar a dúbida sobre a súa eficacia”. Sinalou que “cuestionando as competencias sobre as forzas de seguridade o único que fai é introducir confusión na cidadanía nun momento tan difícil”.
Noticias de última hora en Vigo. Te contamos todo lo que sucede en nuestra ciudad. Desde los sucesos más relevantes hasta artículos de opinión y de interés.